YANGA YA TOA KUFURU USAJILI

Na Paul  Chengula.

YANGA imetenga dau la Sh797 milioni ili kusuka kikosi kipya ambacho kitadumu kwa misimu miwili ijayo na kufanya vizuri zaidi kwenye michuano ya kimataifa kuanzia na Ligi ya Mabingwa Afrika mwakani.

Katika msimu uliomalizika ilitumia karibu Sh500 milioni tu.

Tayari katika kiasi hicho, zimeshapungua fedha zilizotumika kwenye usajili wa nyota wawili wa kigeni Mbuyu Twite na Haruna Niyonzima.

Jopo la usajili wa Yanga limepania kusuka kikosi ambacho kitakuwa imara zaidi na ambacho kitakuwa na mtazamo mpya na tayari Mwenyekiti wa klabu ambaye ni Bilionea Yusuf Manji ameunga mkono.

Habari za ndani ambazo Mwanaspoti imejiridhishwa nazo, zinasema kwamba usajili wa Yanga umepanga kunasa wachezaji wote wa maana wa ndani yakiwemo majina yaliyopendekezwa kama viungo Haruna Chanongo ambaye ni huru na Deus Kaseke wa Mbeya City.

Fungu hilo la Yanga litatumika pia kwenye maandalizi ya kambi kwa ajili ya Ligi Kuu Bara na michuano ya kimataifa, tayari imefahamika kwamba Niyonzima amechukua dola 60,000 (Sh120 milioni) katika mkataba wake wa miaka miwili huku pia Twite akichukua dola 30,000 (Sh60 milioni) akisaini mkataba wa mwaka mmoja.

“Ukiangalia kiasi hicho utaona ni kikubwa sana kwa usajili, lakini pia tunataka kitumike katika kulipia gharama ya kambi yetu ambayo tumepanga itaanza Juni 9 baada ya kocha wetu kurudi Juni 7 mwaka huu,” kilisema chanzo chetu.

Katika harakati hizo za usajili, Yanga imetamka kwamba kwa sasa usajili wa wachezaji wao wa kigeni utalazimika kusubiri mpaka keshokutwa Jumamosi ili kupata majibu ya maombi yao ya ongezeko la idadi kutoka watano wa sasa hadi kumi lililowasilishwa Shirikisho la Soka Tanzania (TFF).

“Hatutaanza kufanya lolote katika usajili wa wachezaji wa kigeni tunasubiri kwanza kusikia nini maamuzi ya TFF katika maombi yetu ya kuwaongeza wachezaji wa kigeni,” aliongeza kiongozi huyo.

Azam yasubiri kocha

Azam imetangaza kusimamisha zoezi la usajili kwa ajili ya msimu ujao.

Uongozi wa timu hiyo umetangaza maamuzi hayo kwa kutaka kusubiri uteuzi wa kocha mpya wa kuinoa timu hiyo, huku majina matatu yakiwa mezani yakijadiliwa